Archive pour la catégorie ‘Evenements’

Etre au courant de l’actualité picarde,

Connaître le calendrier des visites guidées,

Lire les textes picards de Tiodave,

Abonnez-vous à la GAZETTE GREBENOTE (parution aléatoire)

en envoyant un mail à grebenote@gmail.com !

Retrouvez ici la gazette du mois de juillet =

Gazette (juillet 2010)

6  fiefs pi 2 maires (Mr Hunet pi Mr Savoie)! A Marché l’cave, is n’sont point  compteux !

Chés patapoères d’achteure pi d’eutes ayant vétchu dins ch’poéyis, edz amoureux d’Albert, des gins d’Bouchoir pi chés raviseux d’moésons pi d’patrimoène, is étoètent tertous lo.
Merchi gramint à nos dux maires conme aiudes ed guide !
Eune récompinse à l’fin de l’visite, un décatour dins l’église ! Eune gronnée d’saints pi des trésors qu’os ons démucher !
NB = Chés chrijes sont abolites ichi pi os aimons bien des poères sins pépins !

Traduction en français sur simple demande

A chl’apéro Lafleur, os étoèmes 25 lo présints, 100 par l’tchoeur, 1000 par l’pinsée.

Sur el plache du Don d’Anmiens, des parabrairies à roéyures blanques pi rouches pi d’eutes à roéyures  rouches pi blanques, is étoètent rouches itou chés capieux, chés tricots d’pieu.
Un décatour por aller mon Facquier vir ses camarades ed bos. Un drapieu dsur chés épeules de l’estatue d’Lafleur. Pi lo, Lafleur pi Papa Tchutchul qui foètent del breakdinse dans chés rues. Dux journalisses de ch’Courrier Picard à tchestionner, à miler, à  prinde des photos.
No vlo parti dins ch’cabaret d’un eute cabotan, chti qui pisse. Trois tabes rassannées, chés bières commindées, un drapieu picard dépindu au bord de ch’canal avuc dux coeuchètes rouges pi blanches pi nous vlo plus d’troés eures à rire, boère pi canter à s’mémoère.
Chés boins fius is étoètent lo …
Chés tireux d’ficelle avuc Laurent Devime
Chl’intailleu d’cabotans Jean-Pierre Faquier avuc Lafleur pi Papa Tchultchul,
Chés camarades syndicalisses,
Chés conteux, berdleux avuc Ktrine, Geneviève
Chés joènes d’Ozyvo pi d’Conte à Mi avuc Kercoffe, ch’toneilleu
Chés canteux pi jueux d’musique avuc Adrien pi Sam
Chés théatreux avuc Tiotte Gadoux
Chés cultureux avuc Philippe Leroy, Chitcatt
Même Tiot Louis il avoait s’n habillure rouche pi Gaël qu’il étoait-ti rétu avec s’guernouillère rouche !
Pi surprinse ! A 10 eures du soèr, es femme Pascale, es sœur pi s’nieuche qui passent-té nous vir.
Edz amisses, des copains, des camarades, eune grinde famille picarde, du tchoeur, des rires, des canchons à l’Plache du Don …. Ch’étoait ch’don de ch’Lafleur !
In rintrant fin tard à l’moéson, in m’jouquant tout seul dins ch’froéd de chés drops, je m’sus sintu Sandrine… Os étoèmes tertous des Sandrine inhui ….
El 21 juyet 2010, Ch’Lafleur (Frédéric Domon) il o erjoint ch’gardin ed chés héros d’Picardie.

Ozyvo, l’achuchon ed chés joènes ed Picardie, i feusoait el 3ème série de ch’ Tas d’Bos (Woodstock) el samdi 10 juyet 2010. Ch’Lafleur, ch’Lanchron, ch’dirigeu de ch’cinte cultchurel ed Longueau, ch’viche-persidint del Balle à l’Main is étoètent lo ! Du bieu monne !
Pis des joènes !….

16 ans, ch’est l’âge ed Gauthier, adiminché in jueu ed ballon au poing, qui l’o suivi toute el soérée à s’berlaffer pi rire ed boin tchoeur à chés cacoules pi chés diries.

12 ans, Benjamin, vlo pusse d’un moés qui réclame à s’mère d’aller à l’fiète ed l’Hayette. Lo, yo des concerts avuc des vrais musiqueux ! Pis y o des jux picards !

9 ans, l’âge ed Justine, l’tiotte fille à Janine, qu’ale m’o rapassé toutes chés dialogues in chti ed « Bienvenue chez les Chtis ! ». Ale est rédeuse de ch’flim-lo ! Pi achteure ale dminde des mots picards à s’grind-mère….

4 ans, d’pratique quasimint, Capucine…qu’ale étoait lo fier comme un co d’basse-cour avuc ses jus d’éson. (L’école ed Vaux sur Somme is ont ahansé un ju d’éson avuc des mots picards). Capucine ale étoait lo por vinde, un vrai agint commercial ! Du heut ed s’un mète d’heut, ale feusoait s’réclame por sin ju avuc el sérieux d’un pape !

3 ans, ch’cleu del soérée, Eliott, avuc sin timbour, qui l’o réclamé à Adou d foaire del musique picarde dsur scène ! Adou avuc s’guitare, Eliott avuc sin timbour in rythme… pi apreu deux canchons, ches gins edbout à appleudir !!!! Un grind momint !

Ch’maire d’Harponville (Monsieur Renaud), il o dit « Ch’Tas d’Bos, ch’est un rindez-vous que je n’voloais point minquer ! »

Traduction sur simple demande

Verdi 9 juyet 2010, ch’étoait eune verlée dins eune église ! Quoé, des bondiuseries ! Nan, del cultchure pi des voyéages ….
Os savez ti qu’Sapré Tchoeur à Péris i n’euroait jamoés été machonné sins l’décarsure ed 1870 ?! Qu’ech sint patron ed chés nés natifs d’Amérique (chés indiens), ch’étoait Sint Toène ed Padoue ? Pi qu’à Franvillers, os avons eune église féminisse. 80 por chint ed estatues ed fèmes !
In trécopant eune single ringée d’bincs, os ons prins l’batieu por el Corse, ermonter in Belgique, un décatour pèr ch’Portugal, por arriver in Crète, pi Nevers, La Rochelle edvint d’ervenir à Noyon pi Franvilllers.

Traduction en français sur simple demande.

Ch’dirigeu ed l’office du tourisme ed Corbin, il étoait lo ! Falloait point raconter des carabistouilles !
Edvant ed prinde el clé del église (à l’mairie), un boin momint avuc des viux du villache à berdler dsur l’histoère ed Varloé. Is étoètent fin bénaises qu’o foaiche eune verlée ichi.
Arrivé à chl’estatue ed Carnoy, des nazus qui jouètent avuc ed l’ieu. El maristresse ale no dminde si a déturbe. Wate, n’est mie gênant ! Dommage qui savtent point quoé qui n’o indsous ed leu pyids !

D’ertour vers l’plache, eune fame no dit : « os foaites des marches ! os êtes des randonneux ! »
Nan, os sonmes des visiteus !
Un décatour pèr Baillon, pi chl’ernu qui s’annonche …
Os trécope per chés haillures pi os avons sitot freumé nos portes ed carettes equ d’un coeup i pleuvoait à dague !
Bou !, os l’avons écappé belle !

Prochaine visite à Warloy-Baillon le 20 août 2010 à 15h – rindez-vos edvint l’église

Traduction en français sur simple demande

Tiodave intervient sur le Festival « Chés Wèpes Bocage-Hallue 2010 »!

Balade organisée par Chés Wèpes (Agence pour le Picard et Communauté de Communes de Bocage-Hallue) avec David Lefèvre (Ozyvo), Mr Richoux (section randonnée Maison Pour Tous de Villers-Bocage) et les conteurs de Corinticonte.

Le parcours d’environ 2 heures se fait principalement dans le chemin du Tour des Haies du village.

…

Rdv devant l’église à 10h

GRATUIT – contact@languepicarde.fr – 03 22 71 17 00